NBA常規賽本月30日展開，杜蘭特（Kevin Durant）與韋迪（Dwyane Wade）未開波先開戰！繼早前批評韋迪未夠班躋身《體育畫報（SI）》公布的新季Top10後，這位雷霆「得分王」繼續向「閃電俠」窮追猛打，揶揄對方「阻住地球轉」及「係時候交棒」，韋迪被踩到上心口當然要還擊，昨日就喪入25分率領熱火以121:96大炒馬刺，用行動證明寶刀未老！

韋迪（右）用行動證明自己寶刀未老。（美聯社圖片）

揶揄韋迪年紀大

事緣KD對韋迪入圍《SI》新季10大球星排行榜滿肚怨言，認為舊隊友、目前効力火箭的占士夏登（James Harden）更有資格入選，早幾日前接受《Eurohoops》訪問時，杜蘭特繼續咬住韋迪「唔放」：「韋迪係偉大球員，但我認為人老咗就應該讓位，咪阻住班後生上位，不如交棒畀新一代嘅球員啦！」

KD目中無人，韋迪惟有用行動還擊，昨仗大發神威14投10中，貢獻全場最高的25分及7次助攻，帶領熱火大炒馬刺25分，揚威這場上屆「NBA總決賽翻版戰」，相信韋迪於明年1月30日的常規賽硬撼由杜蘭特領軍的雷霆實有好戲睇。