【方傑馬來西亞直擊】征戰車壇10載，2006年MotoGP冠軍海登（Nicky Hayden）風光過，奈何近年表現漸走下坡，睇見新一代車手馬昆斯、羅倫素甚至同輩的羅斯站在MotoGP頂點，海登難免不是味兒。不過這位「鐵甲奇俠」就拒絕認低威，更以兩大NBA偶像高比拜仁及約翰禾爾作奮鬥目標，希望在今季餘下4站的MotoGP做番齣好戲，抬起頭向Ducati車隊道別！

海登雖在排位賽包尾，但仍甚受車迷歡迎，爭相索取簽名。

貴為06年世界冠軍，海登今季一次頒獎台都未上過，昨日於馬來西亞站雪邦賽道排位賽更「包艇」衝線，難免令Ducati車迷失望。笑言職業生涯動手術次數多到「數唔清」的海登，卻未有以傷患作輸車藉口，昨日於雪邦賽車場接受本報訪問時，仍然「阿Q」地展望將來。

海登稱：「受傷係賽車一部分，我做過幾多次手術？真係唔記得，我諗至少有10次啦！我季尾會做多一次手術，拎番手腕粒螺絲出嚟，希望新一季會有好表現。」出生於肯塔基的海登每年冬天都會返其加州寓所度假，亦因此成為了湖人球迷，平時除了會到斯台普斯中心為「紫金兵團」打氣之外，更試過透過經理人找偶像高比拜仁合照。

想似約翰禾爾快絕同儕

湖人近年戰績大倒退，同病相憐的海登表示：「湖人上季成績唔太好，高比拜仁又養緊傷，但我相信『小飛俠』會同我一樣，無論受過幾多次傷，年紀有幾大，都唔會咁易放棄。」海登更自爆甚為欣賞巫師的極速控衞約翰禾爾，笑言希望像禾爾一樣快絕同儕。

今季結束後極可能離開Ducati車隊的海登，早前坦言「未有為車隊帶來太多榮耀」，故此希望在未來4站賽事做到最好，對自己，車隊及車迷作個交代，不讓其Ducati生涯留有遺憾。