今時今日想喺體壇上位,除咗要有真材實料之外,識唔識Social都好重要。好似巴洛迪利咁吖,佢玩Social Network(社交網絡)好有心得,一時擺吓女相,一時就插吓球證,個個「鋪」都鬼咁過癮,唔受網民歡迎就假咯!《體育畫報》(SI)網上版尋日公布「全球體壇百大twitter榜」,「腦殘」拍住高比拜仁同勒邦占士等體壇猛人入選,兼且係唯一上榜嘅足球員,簡直係足壇之光呀!

全球體壇百大twitter榜

呢個「全球體壇百大twitter榜」嘅評選準則,唔係話你個twitter多「追隨者」就贏,係要啲「鋪」夠爆、夠話題性兼且同Fans多互動先有資格上榜。巴洛迪利份人大癲大肺又吹得,今年開通twitter帳戶唔夠1日已經有26萬「追隨者」,網民亦都好鍾意同佢喺twitter吹水,加上「腦殘」無論「鋪」相定「鋪」文都係唔經大腦,間唔時仲「噏撈」女友嘅性感相,間唔時又寸吓人兼插吓球證,條條tweet都鬼咁哄動,今次入圍實至名歸。

唯一入選足球員威過C朗

咁美斯呢?Sorry,美斯係冇玩twitter嘅,不過紅到好似C朗咁都冇份入圍,足證「腦殘」嘅社交人氣係幾咁犀利。同時,呢位AC米蘭前鋒亦係唯一上榜嘅足球員兼意大利人,twitter地位媲美同樣有份入選嘅「小飛俠」、「大帝」同「拳王」泰臣等體壇巨星,邊個嘅twitter仲未「追隨」巴洛迪利嘅話,係時候做嘢啦!