「天兔」襲港玩殘「郎家軍」!香港受到這股「怪獸颱風」威脅,昨有3場甲組賽事須要改期,作客約旦踢亞協盃的傑志上周六晚已經出發,連廣州恒大亦急急腳提早飛赴日本備戰亞冠盃,個個都安排妥當,唯獨「賴低」中國女排!話說「郎家軍」剛在泰國打完亞洲賽,昨飛抵香港轉機返內地時遇上打風,全隊被迫滯留,大嗌救命。

3甲組賽改期 傑志漏夜走

本報體育組同事昨日突然收到中國女排副攻手楊珺菁求救微信,表示中國女排在香港機場滯留,冇飛機、冇酒店、冇巴士,希望有人伸出援手。原來球隊周日凌晨5點在曼谷上機,中午到港,準備轉機返國才發覺航班取消,不但攞不到行李,一時間又難找酒店,連返大陸的大巴及直通車都停止服務,成班職、球員折騰了大半日都未能休息,又攰又狼狽。幾經周折直至黃昏,「郎家軍」終於入住紅磡的九龍海逸君綽酒店,總算有覺好瞓。

至於香港足總昨於早上約11時已宣布所有賽事改期,包括甲組賽事屯門對天行元朗、東方沙龍對愉園,以及前晚已經公布改期的橫濱FC(香港)對太陽飛馬。看來傑志就最醒目,颱風襲港前,前晚漏夜出發,先經20小時機程飛抵多哈,再轉機約旦,昨晚已順利到埗,準備周二再鬥阿爾費薩里。

恒大坐老闆私人飛機赴日

另邊廂,剛殺入亞冠盃4強的廣州恒大(足智彩譯FC廣州),周三首回合作客日職勁旅柏雷素爾,為怕颱風影響廣州航班,球員昨已乘坐老闆許家印的兩架私人飛機到達日本,提早備戰。