2013年籃球名人堂典禮尋日喺麻省舉行，西雅圖超音速「手套」佩頓、紐約人名將班納京治同巴西「得分王」舒密特等12位籃壇猛人正式入選名人堂。前日大會更喺賴史密夫紀念堂舉行年度拍賣盛事，好似勒邦占士嘅騎士波衫、柏賓嘅簽名公牛波衫都係搶手貨，當中「小鳥」布特1992年喺巴塞奧運着嘅夢幻隊外套，就以2萬美元（約15萬港元）成交。
