8個月前幾乎因為肺栓塞冇命，華拿祖醒覺要愛得及時，呢位騎士中鋒終於唔再拖泥帶水，上星期六喺家鄉里約熱內盧搞咗個別出心裁嘅婚禮，迎娶拍拖3年嘅Marcelle Bueri。適逢新季NBA常規賽下月底就展開，「華嫂」批准愛郎歸隊操練延遲度蜜月，咁明事理嘅老婆邊度搵吖？

現年30歲嘅華拿祖出名係「病壞」，今年1月頭因為腳部肌肉撕裂入廠，畀醫生Check到佢肺部有血塊，唔單止要提早收咧，仲隨時有生命危險。好在華拿祖吉人天相，呢件事亦令「爆炸頭」深深體會到世事無常，珍惜眼前人先至最緊要，所以出院之後佢就着手籌備婚禮，畀番個名分Marcelle。

上月中華拿祖隻身返巴西打點婚禮，期間喺機場遇到一對淨識講葡文同韓文嘅韓裔母子，呢兩母子唔知由邁阿密轉飛巴西嘅航班取消咗，同機場地勤又雞同鴨講，華拿祖於是充當翻譯，仲幫佢兩母子Book埋酒店添，事後「爆炸頭」話逃出死門關令佢個人變晒，遇到有需要嘅人應該幫得就幫。

華嫂就老公練波押後度蜜月

好波兼且好心地，難怪華拿祖人緣咁好，今次個婚禮除咗大班親朋戚友到賀之外，仲邀請到唔少體壇名人同藝人出席。華拿祖同Marcelle喺里約熱內盧一間教堂行完禮之後，就去到位於科帕卡巴納海灘嘅酒店開Party，巴西男籃隊友巴布沙、當地歌手Naldo同著名女Dancer艾倫都有撐場，當中Naldo戴住個爆炸頭假髮載歌載舞唱到失聲，氹到新娘子笑到見牙唔見眼。

本身係商界女強人嘅Marcelle，以前同成日周圍飛嘅華拿祖聚少離多幾乎分手，不過Marcelle都知NBA就快開鑼，所以「通融」吓將Honeymoon推遲到2014年，呢幾日同老公仔去紐約叉叉電之後，就會放華拿祖返騎士參加季前訓練營。