梅萊美網衞冕夢碎！今屆美網爆冷連場，繼「瑞士天王」費達拿於男單第4圈「踩蕉皮」後，另一位「BIG4」成員梅萊亦於昨日倒灶，以直落三盤不敵瑞士球手華連加出局，宣布8強止步。衞冕失敗的梅萊輸到癲，於比賽期間掟拍、癲叫、自言自語瓣瓣齊，但賽後仍識英雄重英雄大讚與祖高域爭入決賽的華連加有料到，並坦言要長期keep住狀態唔易，對今季收穫已經好滿意。

梅萊表現差到連自己都接受唔到。（美聯社圖片）

祖高域爭標路途又少一個對手。（美聯社圖片）

華連加爆冷淘汰梅萊。（法新社圖片）

昨日焦點戰果

又掟拍又狂叫

該位「英國天才」昨日打到躁，首盤落敗後已經喪鬧自己：「我打到成個傻仔咁！」次盤更嬲爆掟拍兼不時自言自語，最終這位衞冕冠軍在全場零破發的情況下，以4:6、3:6、2:6不敵賽事9號種子華連加，跟手黑口黑面極速離開賽場。梅萊賽後於記者會表示：「佢（華連加）發球同接發都一流，亦令我陷於困境。」

李娜獲道德風尚獎

梅萊續稱：「我贏咗奧運金牌同溫網冠軍，又以美網衞冕盟主身份參賽，其實過去一年我已經大豐收，要長期保持最佳狀態唔容易。」

職業生涯首次殺入大滿貫4強的華連加，自爆已收到同胞費達拿的短訊祝賀，這位9號種子將於周日凌晨與淘汰俄羅斯球手尤茲尼的「一哥」祖高域爭入男單決賽，雙方過往14次交手，「扮嘢祖」贏足12次，華連加今鋪隨時「過到初一過唔到十五」！（now676台周六晚11:45直播）

女雙方面，鄭潔與美爾莎以0:2不敵澳洲組合芭蒂及迪妮古雅，無緣躋身決賽。另一「金花」李娜則以100%得票率，成為首位獲頒「道德風尚獎」的中國球手。