格芬

攰爆格芬（Blake Griffin）攞滿Fun！「佐敦牌」三子基斯保羅（Chris Paul）、格芬及安東尼（Carmelo Anthony）昨日旋風式襲港，雖然3位NBA巨星舟車勞頓後疲態畢露，當中首度來港的快艇前鋒格芬更多次「放蚊」兼大呻「想返屋企」，不過這位入樽王依然「交足貨」，鋤樽、踢波、玩親民瓣瓣齊，攰到爆都貫徹整古做怪本色冧Fans，「呢啲就係我哋所講嘅專業！」 方傑、Binlo子文報道

格芬

格芬瞓未醒咁樣同班小將擊掌，一樣氹得大家笑到見牙唔見眼。

估唔到格芬都「的」得兩下。

格芬（左）攰到同惠龍兒講想返屋企，大球星真係唔易做。

指導小將時格芬立即回復搞笑本色。

3位Jordan Brand球星上周一開始展開「Flight Tour飛翔之旅」，先後走訪北京、上海、廣州及台北4大城市，更於前晚決定臨時「加場」，結束台北站行程後加設香港站畀個驚喜本地球迷，昨凌晨零時飛抵香港之後，早上10時便現身理工大學，與一眾香港籃球小將見面。兩大球星CP3及甜瓜固然受歡迎，但講到焦點所在，必數首度訪港的格芬。

鋤樽「的」波乜都做齊

活動期間曾向南華球員惠龍兒大呻「攰到爆想返屋企」的格芬，多次被記者目擊打呵欠，不過這位入樽王就認真專業，甫到場就主動向15位協青社籃球小將擊掌Sell親民，熱身期間突然Show腳法玩「的」波，之後又大晒招牌式鋤樽，將現場氣氛推至高峰，盞鬼之餘又識氹人，難怪連索模厄普頓（Kate Upton）都被他迷倒，近日被美媒踢爆2人拖手夜遊紐約啦！

自爆羨慕CP3渴望做老竇

格芬出道以來頻頻換畫，但這隻「冇腳雀仔」卻希望效法CP3般做老竇，格芬於訓練營結束後向主持人表示：「我好鍾意同CP4（基斯保羅兒子）玩，佢好過癮、好聰明。（會唔會想生番個？）會，你哋要密切留意！」3位球星亮相1小時後便離去，在多名保鏢護送下返回半島酒店醫肚休息，之後就到灣仔NIKE專門店試衫，然後便於下午3時乘飛機返美，結束不足24小時的閃電式香港之行。