馬克加素9月將會帶領「鬥牛兵團」，出戰歐錦賽。（Getty Images圖片）

NBA球星有名有利，好似西班牙嘅馬克加素（Marc Gasol）呢啲高大威猛嘅壯男肯定大把女仔埋身，不過呢個灰熊筍盤出道咁耐都冇乜負面新聞，上個禮拜同女友比爾莎（Cristina Belsa）喺西班牙希羅納拉埋天窗之餘，仲落實出戰9月舉行嘅歐洲籃球錦標賽，撐起甩皮甩骨嘅「鬥牛兵團」，呢啲咁有「膊頭」嘅男人真係絕晒種o架啦！

馬克加素9月將會帶領「鬥牛兵團」，出戰歐錦賽。（Getty Images圖片）

馬克加素份人同佢嘅球風一樣，都係咁實而不華同低調，呢位去季NBA常規賽最佳防守球員，上個禮拜日同女友比爾莎喺位處西班牙希羅納嘅森林低調結婚，唔單止請晒保安駐場謝絕採訪，大婚當日亦只係請咗大佬加素（Pau Gasol）、列比奧（Ricky Rubio）、盧利（Sergio Llull）同洛迪古斯（Sergio Rodriguez）等幾位國家隊隊友嚟飲。

雖然婚宴場面唔算熱鬧，但有狗仔隊擒高擒低影到麥克加素不時抱起比爾莎，一時就攬埋一舊錫錫，人少少嘅婚禮都一樣夠晒Sweet。榮升老襯結束6年愛情長跑之後，馬克加素就唔淨止要撐起頭家，仲要撐起埋西班牙男籃。

9月夥列比奧出戰

歐錦賽將會喺9月5日假斯洛文尼亞開戰，由於雷霆大前鋒伊巴卡（Serge Ibaka）同湖人球星加素都申請免役，內線人手都真係幾薄弱，不過馬克加素已經落實會聯同列比奧、卡特朗（Jose Calderon）等隊友參戰，呢啲男人咪有承擔囉！