澳門世界女排大獎賽球迷投票選最愛球員

「2013澳門銀河娛樂世界女排大獎賽」下月2至4日會喺澳門綜藝館上演，中國、古巴、荷蘭同保加利亞將競逐此站冠軍，賽會繼續舉辦「『銀河娛樂之星』─我最喜愛球員選舉」，澳門同香港體育記者協會早前已選出8位候選球員，包括中國隊嘅惠若琪同曾春蕾、古巴莉絲姬及姬爾、荷蘭古芙絲及芙莉雅，同埋保加利亞嘅姬迪寶娃、華絲莉娃。

比賽期間大會將喺綜藝館門口設投票箱，每日第2場賽事開賽後就會截止投票，當選球星將可獲逾2萬澳門元嘅獎品禮券，大會亦會抽出一名幸運球迷，有機會得到銀河娛樂送出住宿及餐飲禮券。賽事門票已公開發售，詳情可瀏覽www.sport.gov.mo或登入www.galaxyentertainment.com。