婚前大解放，勒邦占士（LeBron James）、莎雲娜（Savannah Brinson）賭城開P各有各玩！「大帝」今季帶領熱火衞冕NBA總冠軍，下個「任務」就係迎娶青梅竹馬嘅「V姐」莎雲娜，等到頸都長終於有個名分，「V姐」梗係開心到爆啦，前日佢就喺拉斯維加斯舉行告別單身派對，唔單止Deep V上陣，仲請埋舞男助威，激過同樣喺賭城開P嘅占士多多聲喎！

筋肉猛男幫莎雲娜助興

高中就同占士行埋，仲幫呢位熱火球星生咗兩件，9月14日就會喺加州聖迭戈「升呢」做「大帝嫂」嘅莎雲娜，前日孖住好姊妹、基斯保羅（Chris Paul）老婆Jada玩轉賭城。呢個告別單身派對由朝玩到晚，無王管嘅「V姐」日光日白已經大解放，着住件超Deep V背心加短牛亮相大騷勁爆身材，去到夜晚就繼續留喺酒店入面狂歡，全程酒不離手大跳辣舞之餘，仲請咗兩件筋肉舞男出嚟助興，驚唔驚未婚夫呷醋呀？