康利

【潘彥韜廣州直擊】NBA3星Chok爆廣州！約翰禾爾（John Wall）、列拿特（Damian Lillard）及康利（Mike Conley）3位新世代控衞昨日聚首穗城，為運動贊助商adidas做宣傳，「指定動作」除了向在場400位球迷大騷超凡球技之餘，3位球星更一反常態連環爆Chok，並主動憑Tee寄意向香港籃球躉打招呼，果然識冧Fans喎！

康利

列拿特

約翰禾爾

三人捧住代表佢哋嘅公仔，約翰禾爾（左）笑住話要帶返屋企。

列拿特（中）同Fans影相都要Chok住影。

康利（左）送鞋畀表現傑出嘅學員。

三名球星特地向本報讀者送上簽名問好。

禾爾、列拿特及康利均以快速打法見稱，今次廣州行亦貫徹作風，用極速冧爆Fans，甫到埗就在「隻抽」Tee上簽名向本報讀者問好，祝各位有個愉快夏天。昨日3人齊齊出席贊助商宣傳活動，期間禾爾及康利即席互鍊3分波，3人又親自落場向年輕學員傳授籃球絕學，面對在場400位球迷更一直「四萬咁口」，勁有耐性與Fans合照，非常識撈。

禾爾 康利互鍊3分波

當中於去季榮膺新人王的拓荒者新星列拿特最識搶鏡，全程Natural High由頭Chok到尾，一見記者舉高相機就自動波猛扮型仔。2010年狀元禾爾亦「唔執輸」，失驚無神於喇叭前面「紮行馬」手舞足蹈，反觀灰熊控衞康利就選擇在靚女球迷側邊「低調Chok」，3大NBA球星各有各Chok。被問到中、美球迷有何不同，巫師Icon禾爾就指兩地球迷一樣熱情，康利則表示：「最大的不同是我們並不常來，中國球迷很難有機會見到我們，所以希望今次廣州行能為Fans帶來美好回憶。」

列拿特想入選全明星

今個月15號就23歲「牛一」的列拿特，識做地向記者表示中國之旅就是自己最好的生日禮物，並稱：「奪得新人王會令大家對我有更大期望，這會推動我繼續進步，來季希望能入選全明星，然後就是季後賽、總冠軍，這些都是每一個球員夢寐以求的。」列拿特兩隻手臂都滿布「公仔」，同為紋身愛好者的禾爾雖然於早前被評為「NBA十大最差紋身球員之一」，但就坦言毫不介意：「我紋身只是因為我自己喜歡，而且只要我不脫衣服，其他人都不會看到我的紋身，所以完全沒有必要理會其他人的看法。」首度訪華的禾爾和康利今次中國之旅暫告一段落，至於列拿特昨晚就已飛往台灣，出席今天的贊助商活動。