梅萊不負國民所望晉級,賽後鬆一口氣。(美聯社圖片)

費Sir維迪溫網打對台!昔日曼聯師徒昨於溫網戰場「各為其主」,費格遜昨晨到中央球場力撐蘇格蘭同胞梅萊,這位「英國希望」亦不負所望,在盤數落後0:2的劣勢下絕地反擊淘汰西班牙型男華達斯高,連續5年殺入溫網4強;至於尼曼查維迪就與費Sir「作對」,化身幸運星見證梅萊爭標大敵祖高域晉級。

梅萊不負國民所望晉級,賽後鬆一口氣。(美聯社圖片)

華達斯高雖然輸波,但表現令人拍爛手掌。(美聯社圖片)

去年溫網及美網都有撐梅萊的費格遜,曾經表示「睇梅萊打波緊張過指揮曼聯」,這位傳奇領隊如今退休一身輕,昨晨就聯同梅萊母親Judy齊齊殺入中央球場睇波,甫到達包廂就撞正「三獅兵團」主帥鶴臣,兩位老人家更攬頭攬頸寒暄一番。獲爵爺這位超級粉絲打氣加上主場出擊,梅萊未知是否緊張過度,首盤受制於華達斯高的強勁發球,次盤則連番犯錯,一度落後0:2,睇到費Sir勁擔心。

不過梅萊站穩陣腳後大反撲,耗時3個半鐘後驚險以4:6、3:6、6:1、6:4、7:5反勝華達斯高,繼續力爭成為77年來首位於溫網登頂的「英」雄!梅萊連續5年躋身溫網4強,費Sir興奮到於包廂舉手歡呼,情況十足十曼聯贏波一樣。

畀主持侮辱黑面但唔記仇

賽後《BBC》主持人李察遜「懶風趣」,問梅萊是否於更衣室遭受教練蘭度的「費格遜式風筒問候」才能實現大逆轉,激到梅萊黑口黑面,《今日美國》更批評李察遜的問題侮辱了梅萊的精彩演出。梅萊將與首度殺入4強的波蘭新星贊奴域斯爭入男單決賽(now671台周五晚7:30直播),他自爆賽後與費格遜詳談15分鐘後大受激勵,又大人不記小人過地向記者稱:「咪咬住李察遜唔放,佢已經向我道歉。」

芭杜莉率先入決賽

攜同妻子Ana入場睇波的維迪,原先與爵爺於中央球場排排坐,但就於比賽期間「轉場」到1號場為塞爾維亞同胞祖高域打氣,這位「一哥」順利以盤數3:0「拍走」捷克球手博迪克後表示:「尼曼查維迪係我偶像,有中央球場靚包廂都唔坐過嚟睇我,真係好感動,佢簡直係我嘅幸運星!」以不失一盤佳績殺入4強的祖高域,豪言即使決賽硬撼梅萊亦有信心奪冠,擺明當4強對手博迪奧透明喎!

至於昨晚女單首場準決賽,法國球手芭杜莉以6:1及6:2輕取比利時的菲立根絲,率先打入決賽。