譚詠怡

暑假就快殺埋身，《太陽體育》今日同大家介紹「水上飛氈」，據「滑浪達人」教練Bosco所講，即使玩家唔識游水，一樣可以喺水上飛翔，佢仲搵埋靚女譚詠怡（Victoria）做示範添！大家一於搵時間試吓呢張「水上飛氈」，齊齊做「水上飛仙」啦！

譚詠怡

救生衣

飛氈

Victoria：勁刺激！

平時睇電視見人玩滑浪，幾乎個個都係勁大隻身手好，不過教練Bosco就話玩「水上飛氈」嘅難度低好多，就算平時係個零運動嘅人，就好似今次為我哋示範嘅Victoria咁，都絕對應付有餘！Bosco喺開船出海之前，只係教咗Victoria兩樣嘢，一係要着救生衣，其次係喺過程中必須揸實飛氈上面個手柄，之後就任由架快艇拉住走。

因為唔識游水，起初Victoria都有啲驚，但坐落張飛氈度一陣，佢就發現原來可以四平八穩咁浮喺水面，信心大增。之後快艇開動拖行，Victoria最終喺水面滑行咗十幾分鐘，連頭髮都冇濕！Victoria話：「冇諗過唔識游水都可以滑水，好刺激！經過今次，我會扚起心肝學游水，希望可以『升呢』玩Wakeboard練身手，將來要拍動作片都得嘛。」

教練Bosco之後補充，原來水上飛氈有多種玩法：「對於初學者嚟講，我哋只係會拖住佢滑行，難度好低。想刺激啲，可以試吓坐、跪、甚至企喺飛氈上面，如果撞正逆風，成張飛氈仲會離開水面『飛行』，到時真係曉飛嘞！」