大帝占士

「熱刺」引發1.7億美元（約13億港元）生死戰！NBA總決賽終極戰今早爆發，大戰前夕熱火推出「大帝」Tee造勢，對家馬刺亦舉行「消夜研討會」激勵士氣，雙方為爭冠各出奇招！（now635台、廣東體育及中央5台周五早上9:00直播）

大帝占士

波飛炒價31萬

NBA總決賽「搶7戰」今早假邁阿密美航球場Tip Off，美媒預計這場顛峰對決勢必創造收視紀錄，帶挈聯盟從贊助商進帳1.7億美元收入，當地票務網站《TiqIQ》更透露，今仗最貴波飛已被炒到4.1萬美元（約31.7萬港元），足證「搶7戰」叫座力驚人。

於Game6打到甩頭帶的勒邦占士（LeBron James），揚言因迷信關係會繼續戴頭帶，不過熱火會方昨日就推出印有「NO HEADBAND...NO PROBLEM（冇頭帶冇問題）」的「大帝」Tee掠水兼造勢，隊友保殊賽前更聲言永不放棄：「上仗提早離場嘅球迷唔使嚟睇Game7，留喺屋企睇得啦，我同班手足就未到完場都唔會放棄嘅！」

至於馬刺前日輸波後則集體食消夜作賽後檢討，老將鄧肯（Tim Duncan）稱：「今餐消夜好有幫助，一來唔使各自返房胡思亂想，二來可以傾吓Game7策略。」