今屆NBA總決賽緊湊到不得了，於系列賽場場睇到足的碧咸雖然正在訪華，但昨日就透過facebook「鋪」相，指自己身處內地一樣緊貼熱火對馬刺的NBA總決賽，不愧為NBA忠實球迷。

自嘲耐冇踢波右腳生銹

這位靚佬目前正展開中國之行，前日下午抵達南京出席完中超球隊江蘇舜天的記者會後，就與舜天隊長陸博飛鬥射罰球。「萬人迷」的招牌罰球威震全球，不過今次就老貓燒鬚，夾埋10腳只得1球命中目標，隨後與舜天門將鄧小飛進行12碼PK戰亦有兩球宴客，「萬人迷」笑稱已經兩星期冇踢波，導致黃金右腳生銹。

比併完球技之後，碧咸入鄉隨俗食中菜，先飲茅台，然後就試勻酸甜雞球、小籠湯包、黃金蝦球配蒜蓉蘆筍等美食，期間更全程用筷子進食冧Fans，抵「咸哥」受歡迎。昨日下午，碧咸抵達今次中國之行第三站上海，甫落機就參觀中超球隊上海申鑫訓練，負責獻花給碧咸的女孩，9年前曾為來華擔任《2004精英模特大賽國際總決賽》評審的維多利亞獻花，與碧咸兩公婆勁有緣。