梁灝雋一玩SuP即上癮，依家仲用嚟訓練體能。

夏天殺到，《太陽體育》今日有好介紹，喜愛陽光與海灘的你，不妨考慮一嘗「潮玩」Stand up Paddle boarding（立式單槳滑水，簡稱SuP）滋味！這種新興水上活動有幾潮？就連英國著名時裝設計師Stella McCartney，今夏新作亦有用Paddle boarding做主題，至於兩位香港滑浪風帆型男梁灝雋（Andy）及陳敬然（阿英）同樣極力推介，包你一玩即上癮！

梁灝雋一玩SuP即上癮，依家仲用嚟訓練體能。

阿英（左）同Andy玩到棄槳用手划。

阿Ken即場示範點掟彎。

Stand up Paddle boarding源自夏威夷，早10年已風靡歐美，近年傳到亞洲，「風帆馮德倫」梁灝雋早兩年在英國試玩後即被它深深吸引：「你自己玩又得，約朋友玩又得，喜歡激嘅可以衝浪，想優閒又可以划出海睇日落。」Andy早兩個月更豪花5位數字買新板，就知道他幾着迷。

新作Paddle boarding做主題

與此同時，去年倫奧為英國隊Design制服的Stella McCartney，又一次將體育運動和時裝Crossover，其adidas系列的2013春夏設計，都以席捲全球各大海灘的Paddle boarding作為主題，充滿陽光氣息，足見這項「潮玩」運動已殺入時裝界，魅力非凡。

其實Stand up Paddle boarding玩法簡單，最重要是在板上取得平衡，然後再用槳划水前進就可出海，有女士還喜歡在板上做瑜伽，亦有人划出海釣魚。Andy透露，如果加快速度的話消耗量頗大，所以很多男女都會用這項運動消脂及Keep fit，他最近已經用Stand up Paddle boarding取代岸上踩單車作體能訓練。

衝浪釣魚做瑜伽仲可以減肥

許多水上活動都要求參與者懂得游水，立式單槳滑水卻沒此規例，不過當然要穿上救生衣。Andy說：「我有個女性朋友唔識游水，原本佢唔敢落水，但經過半粒鐘後，佢已經跟埋我哋幾個朋友齊齊出海，仲話下次要再玩添！」Andy本月23日將踏上征途，赴法國出戰歐洲滑浪風帆錦標賽，8月再角逐遼寧全運會，他坦言對兩項比賽都抱平常心，但會全力爭取獎牌。