勒邦占士（LeBron James）乞人憎形象深入民心，隨着熱火於總決賽首戰輸波，以洛文（Dennis Rodman）為首的「反帝大聯盟」即刻抽水，揶揄「大帝」未夠班與米高佐敦（Michael Jordan）相提並論，小牛老闆古班（Mark Cuban）更自掏荷包做研究，期望以科技打擊像占士這類「插水怪」！

球迷惡搞揶揄插水

「籃板王」洛文退役多年，但曝光率依然高企，昨日這位公牛名將又試圖博出位，踩到占士一文不值：「如果占士喺90年代打NBA，佢只係一個好普通嘅球員，咪再搵佢同佐敦比啦，根本唔同Level！」有球迷更加改圖惡搞占士，以電子遊戲《NBA 2K13》的專屬手掣操作說明來恥笑「大帝」擁有「第4節失蹤」及「插水」等特別技能，勁盞鬼。

小牛老闆古班亦「唔執輸」，昨日宣布捐出10萬美元予一所美國大學作為18個月研究經費，希望透過電腦技術分辨衝撞及插水，從而杜絕插水歪風。