牡丹雖好都要綠葉扶持，占士、韋迪、保殊火併鄧肯、柏加及真路比利（Manu Ginobili）的「巨頭大戰」固然矚目，但贏波關鍵隨時落在雙方的「X-Factor」身上！據《ESPN》的民調顯示，除了6位巨頭之外，最有機會左右大局的球員是獲得43%選票的李安納（Kawhi Leonard）。

保殊寸馬刺老餅多

今季表現突飛猛進的李安納出名防守耍家，籃板及偷波都屬強項，總決賽獲委以重任防守熱火球星勒邦占士無疑是一大考驗，不過該位21歲小將稱：「我雙臂展開達7呎3吋長，唔係話唔畀占士射波，不過我會逼到佢次次都要高難度起手，減低佢嘅命中率。」

熱火方面，前鋒保殊未開波先開火，揚言馬刺老餅太多，難敵正值當打的熱火。之不過該隊剛於東岸決賽打足7場，抖少馬刺7日，體能上明顯輸蝕。翻查往績，馬刺過去4次奪冠當中，有3次總決賽前休息時間至少達7日，如今馬刺抖足9日叉爆電，無疑對一眾老將有利。