正印 粉絲都話有咗 超人BB媽媽加到5個！
杜域侯活（Dwight Howard）連環做老竇！呢位湖人球星出名係冇腳雀仔，難得近半年修心養性，歌星女友姬絲汀（Christine Vest）最近仲被踢爆「有餡」，本來可喜可賀啦，之不過日前有位女球迷就踩入馬刺主場舉牌，話自己都有咗「超人」骨肉，「一炮雙響」第5度榮升Daddy，今勻都唔知應唔應該恭喜侯活喇！
姬絲汀Happy凸晒肚睇波
自稱係虔誠教徒嘅侯活私生活混亂，出道以嚟不斷沙沙滾，直至遇上模特兒兼歌手姬絲汀先稍為定性，上年年尾仲向對方求婚添！據美媒《MediaTakeOut》報道，姬絲汀喺本月13日透過twitter留言話「好Happy」，今個禮拜一入場睇湖人作客馬刺場季後賽時，班狗仔隊（目及）到佢凸晒肚，唔怪得咁開心啦！
球迷舉牌爆同侯活有一手
之但係好戲在後頭，有位叫伊莉絲（Iizz Weston）嘅女球迷，喺呢場波嘅賽後向傳媒自爆同侯活有一手，仲舉牌話：「杜域，我將會成為你第6任BB媽媽！」伊莉絲之後仲喺侯活個twitter窮追猛打，「超人」事後扯火回應：「我冇5個BB媽媽，你咁做真係唔好睇，唔係淑女所為。」
杜域侯活唔認有6個，話連5個都冇，美媒幫侯活計過數，「超人」的而且確冇5個BB媽媽咁多，佢2010年拋妻棄子，同前魔術啦啦隊成員里德（Royce Reed）離婚，之後搞大過健身教練Alexa Hope同模特兒Tiffany Reyner個肚，連同姬絲汀在內，伊莉絲頂多係侯活嘅第5任BB媽咪，不過點都好啦，呢壇嘢睇怕「超人」都有排煩喇！
NBA季後賽周五秩序
NBA東西岸季後賽形勢