韋迪帶領熱火Lead到2:0

睇熱火點止淨係睇勒邦占士（LeBron James）吖？佢嘅好拍檔韋迪（Dwyane Wade）一樣咁堅！「閃電俠」尋日攻入全場最高嘅21分，帶領熱火主場以98:86勇挫公鹿，總比數領先到2:0，聽朝韋迪重返成名地密爾沃基，隨時再發威劏「鹿」都似！（now635台周五早上7:00直播）

傳米克布朗下季教騎士

查實熱火同公鹿昨仗咬得好緊，好在韋迪喺末節挺身而出，射入幾個關鍵波先至贏到公鹿。經歷今場波之後，「閃電俠」季後賽總得分已經累積到2,813分，追平紐約人名宿伊榮（Patrick Ewing）嘅紀錄，並列NBA季後賽得分榜第27位。韋迪喺馬凱特大學打出名堂，佢件大學波衫已經喺同時係馬凱特大學同公鹿主場嘅夏里斯巴特利球場榮休，據報聽朝重返成名地會獲大量密爾沃基球迷支持，作客都當主場咁打，熱火讓6.5分睇怕開上盤冇乜難度。

另外，克利夫蘭傳媒指騎士同前湖人主帥米克布朗（Mike Brown）傾掂數，雙方已經簽訂5年總值2,000萬美元嘅合約，米克布朗來季會重返騎士執教鞭。