派糖宣傳賀生辰 舒娃送飛吻宅男冧到暈

舒拉寶娃派糖預祝生辰！該位上周五（19日）踏入26歲的俄羅斯「天后」，日前走到洛杉磯South Bay一間有得賣其自家品牌Sugarpova糖果的舖頭宣傳，當地居民知道大美人駕臨，早就排隊等攞簽名影合照，「娃姐」亦來者不拒，一改冷艷形象。

教練團自製餅乾氹伊人

「舒娃」事後把相片上載到自己facebook，其中一張飛吻相令不少「宅男」神魂顛倒，立即有大堆男士回應，如「我捉住咗你個Kiss喇」、「我哋有一個共同之處，就係我唔識你，你亦唔識我，所以我愛你」、「Sugarpova好甜，你都係，尤其你個嘴唇，噢……」。

世界排名第2的舒拉寶娃牛一當天仍在球場練波，全力備戰泥地賽季，並獲教練團隊送上自製餅乾，砌成「Happy Birthday Champ（生日快樂，冠軍）」賀壽，令伊人笑逐顏開。