麥基迪 迪安東尼 爭破魔咒

湖人及馬刺兩支傳統勁旅今晚會於首圈季後賽正面交鋒，大戰前夕兩軍都受到黑氣籠罩。「紫金兵團」主帥迪安東尼（Mike D'Antoni）遇着馬刺教練普波維治（Gregg Popovich）例牌冇好下場；馬刺陣營亦有頂級黑仔麥基迪（Tracy McGrady）助陣，今次黑鬥黑肯定好睇過戲！（開賽時間：周一凌晨3:30）

「紫金兵團」自全明星周末後重返勝軌，28輪常規賽贏足20場趕搭季後賽尾班車，難怪球會總經理古查克（Mitch Kupchak）前日寫包單，指主帥迪安東尼來季肯定繼續有得撈。迪帥執教經驗豐富，曾經兩次率領太陽殺入西岸季後賽決賽，即使王牌高比拜仁（Kobe Bryant）打柴宣布提早收咧，球迷依然對迪安東尼及由杜域侯活孭飛的湖人抱有極大寄望。之不過翻查往績，原來迪帥歷來3次於季後賽帶領太陽鬥普波維治都輸晒（見附表），擺到明格食格！

高比通宵度橋獻計

馬刺亦「唔好得幾多」，新加盟的麥基迪無疑經驗豐富又好波，但職業生涯每逢躋身季後賽都定必在首圈出局，堪稱佗衰家。大家一樣黑爆，高比拜仁拒絕認命，就算因跟腱撕裂提早收咧都一樣交足貨，前日自爆度橋度通宵研究如何砌低馬刺，又透露會透過打電話及發短訊向迪帥及隊友獻計，實行幕後督師。這位湖人球星昨日還在twitter上載一張包括主帥迪安東尼（Mike D'Antoni）和2位球會高層到訪大宅探訪的相片（下圖），「小飛俠」在相片中疑似左腳被截肢。不過網友睇清楚後不難發現，只是他的左腳石膏與背後牆腳顏色相近，才引發虛驚。高比拜仁聲言與3大高層討論到湖人未來發展方向，似乎對復出重振雄風充滿信心。

馬刺3寶打到殘讓唔起

馬刺踏入季尾搏到殘，柏加（Tony Parker）及鄧肯（Tim Duncan）漸露疲態，而且真路比利（Manu Ginobili）亦只是剛剛傷愈，讓到湖人8.5分實在太狠，寧捧常規賽5連勝衝線的湖人，要下盤。