湖人季後賽冇運行

湖人過到初一,過唔到十五?NBA常規賽昨日煞科,萬眾注目的湖人全靠爵士輸波「帶挈」,成功趕搭季後賽尾班車,更隨即於主場砌低火箭以第7名衝線。「紫金兵團」避「雷」成功,將於季後賽首圈面對「二哥」馬刺,之不過該隊近年就被「阿7魔咒」纏身,是福是禍仍屬未知數!

隨着爵士昨日以70:86不敵灰熊,湖人未出場已經提早鎖定季後賽資格,因左腳跟腱撕裂提早收咧的高比拜仁(Kobe Bryant)最激動,全程安在家中睇直播兼透過twitter留言大吐烏氣,先表示「睇死湖人入唔到季後賽嘅人去晒邊?」繼而又稱:「季後賽承諾兌現,要邁向下一步!」

兩年第7衝線首圈止步

湖人士氣大振,昨仗雖一度被柏臣斯(Chandler Parsons)的壓哨3分波追至90平手要打加時,但仍憑加素(Pau Gasol)貢獻17分、20個籃板及11次助攻,主場以99:95勇挫火箭,跳升西岸第7位躋身季後賽。常規賽曲終人散,季後賽首圈將於香港時間周日凌晨Tip Off,打頭陣由紐約人鬥塞爾特人,衞冕的熱火則於周一早上登場鬥公鹿,但講到焦點肯定非「紫金兵團」莫屬!

夏登倒戈雷霆

翻查歷史,湖人最近兩次以「阿7」身份衝線都無好下場,分別於05至06、06至07球季不敵太陽宣布首圈止步,下周一凌晨與馬刺於西岸8強Game1硬撼勢成季後賽首圈焦點。至於被「紫金兵團」踢落第8位的火箭,則會於首圈挑戰西岸「一哥」雷霆,占士夏登(James Harden)倒戈相向同樣備受關注。

另據《ESPN》報道,前湖人主帥積遜(Phil Jackson)有意於來季重返NBA,但就會轉型以管理層姿態亮相。

加素(左)取得三雙,助湖人趕上季後賽尾班車。(美聯社圖片)

代替拿殊打正選的布力克(左)為湖人攻入全隊最高24分。(美聯社圖片)