板球孖仔愈玩愈Like

特別、刺激、擴闊社交圈子，一次過滿足三個願望！這並非廣告Slogan，而是今天《瓣瓣精》的開場白。現就讀張振興伉儷書院中五的袁氏兄弟「大孖Timmy」「嘉廉」和「細孖Tommy」「嘉謙」，於7歲那年因媽媽希望兩兄弟可以參與既好玩，又特別的運動，偶然之下被康文署「板球訓練班」的宣傳橫額所吸引，自此兩兄弟便與板球這種「冷門」運動結下不解緣。圖/文：大頭仔

眾所周知，與足球、籃球和游水等比較，板球在香港絕對是冷門運動，而且參與者一直都以外籍人士為主，故回想起自己的「板球路」，同為校內運動健將的「嘉廉」和「嘉謙」都自覺不易行。

「由最初媽咪幫我哋報名到依家，雖然差唔多有10年，但期間其實都停過兩、三次，或者因為真係少香港人玩，所以一班或者計劃完咗，就要等好耐先再有第個。」「嘉謙」回憶道。但情況於兩年前開始大不同，那要多得「大細孖」當初康文署訓練班的其中一位導師「A仔」Adrian李嘉俊。「2年前『A仔』同我哋講，話成立咗一隊淨係華人參加嘅板球隊『紀利雄獅』，問我哋有冇興趣參加，梗係有啦！」「嘉廉」謂。

學生 在職人士都啱玩

成立兩年多以來，紀利雄獅目前有逾30名隊員，並角逐板球總會「星期六聯賽」的乙組賽事，身兼紀利雄獅球員、隊長及經理人等多職的「A仔」指出，儘管球隊成立日子尚淺，隊員中有初中學生，亦有各行各業的在職人士，但彼此都十分投入，在平均每星期一至兩次的操練中，都會認真練習，務求在正式比賽時取得更大樂趣。由於不少隊員都是學生哥，為了不影響他們的學業，免讓家長們操心，故球隊在操練時間上都會盡量遷就，「A仔」亦不時為「師弟」們加操。

採訪當日，正是「A仔」為「大細孖」安排的「私訓」，只見兩兄弟練習態度認真，熱身過後互相協助穿妥裝備，便輪流擔當擊球手和投手。「由於每場賽事擊球手只有一次機會，一旦畀對方Out咗，就只可專心睇波，所以練習擊球嗰陣真係唔可以偷懶。」戴上頭盔、一臉認真的「嘉謙」表示。「至於投手投球好壞，將直接影響到對方嘅得分機會，所以即使投球體能消耗好大，我都會跟足『A仔』嘅指示去反覆練習。」自言因忙於應付考試疏於操練的「嘉廉」，練習投球不消一會即身水身汗。

目標入港隊

雖然板球是冷門運動，對體能和技術的要求又高，但對足球和羽毛球皆精的「大細孖」來說，將會繼續堅持下去！「媽咪當初幫我哋報名學板球，就係想我哋玩特別啲嘅運動，如果我哋華人都可以打到入選香港隊，咁咪仲特別？踢波、羽毛球呢啲項目想代表到香港好難啦！但板球應該有機會嘅，所以我哋會繼續Keep住，希望先為紀利雄獅取得佳績，再朝入選香港隊嘅目標進發！」「嘉謙」話畢便與「嘉廉」重返訓練場，繼續為夢想而努力。

紀利雄獅

紀利雄獅球員、隊長及經理人等多項職務集一身的李嘉俊（左圖後排左五）表示，球隊除日常練習和參與板球總會的聯賽外，亦會拉隊出外集訓和交流，早前就曾到廣州集訓兼與國家隊拍跳。超過30名球員來自不同階層，不論老幼相處融洽，歡迎對板球有興趣兼有一定認識的人士加入，詳情可瀏覽球隊專網www.glhscrickethk.com。