高比老婆偷嗒Rapper

湖人球星高比拜仁（Kobe Bryant）風流成性，唔知係咪近墨者黑呢？最近連佢老婆雲妮莎（Vanessa Laine）都開始唔生性，自從幾個月前開通Instagram戶口之後就大解放，表面上晒恩愛「鋪」溫馨家庭照，實際就猛咁Show Off惹火身材，近日仲畀美媒踢爆佢紅杏出牆偷嗒饒舌歌手AP.9添，呢位人妻都算出位咯！

現年30歲嘅雲妮莎雖然係兩女之母，不過依然保養得好好，有樣有身材梗係要留倩影啦！呢位人妻同唔少後生女一樣都鍾意玩自拍，上年尾開咗個Instagram帳戶之後，係就係上載咗唔少同「小飛俠」甚至兩個囡囡嘅合照，但自拍性感相就佔大多數，唔係晒長腿就係逼爆衫嘅低胸相，想唔引死麻甩佬都難！

雲妮莎畀31萬掩口費

雲妮莎又惹火又豪放，話冇狂蜂浪蝶埋身？邊有人信呀！據美國饒舌歌手AP.9日前向《Terezowens》爆料，佢同一位湖人巨星嘅老婆有一手，事後女方為冚住單嘢仲畀咗4萬美元（約31萬港元）掩口費佢添，唔少美國傳媒都估雲妮莎就係呢位「偷食」人妻。

湖人季後賽資格告急

老婆唔生性，老公「小飛俠」仲點專心打波吖？尋日高比雖然攻入全場最高嘅31分，奈何起手33次炒足22球，連累湖人作客以92:96輸畀鷹隊，更大鑊嘅係高比臨完場前一次跳投差錯腳踩親鷹隊後衞丹迪鍾斯，之後高比仔落地唔好，搞到嚴重扭傷左腳足踝要無限期休戰，令殘陣嘅「紫金兵團」衝擊季後賽任務告急，聽朝佢哋造訪東岸勁旅溜馬唔慌有運行，溜馬讓5.5分，照撐上盤。（now635台周六早上7:00直播）