小四向小三發死亡恐嚇 伊雲斯搞大妓女個肚！

3年前先榮獲NBA「新人王」嘅帝王後衞泰拉基伊雲斯（Tyreke Evans）近季走晒樣，鬼咩，呢個賤男玩到癲，唔影響場上表現就假！據美媒《inflexwetrust》報道，原來伊雲斯家陣一腳踏三船，最近仲搞大埋著名性工作者Angel Brinks個肚，呢位小四更加向小三Ashley Logan發死亡恐嚇，今鋪睇伊雲斯點收科！

一腳踏三船唔認數

本身已經有個跳舞老師女友Corina嘅伊雲斯，年頭被踢爆係艷星Ashley個肚嘅經手人，估唔到衰嘢愈揭愈多，洛杉磯名妓Angel日前又話自己有咗伊雲斯嘅骨肉，但就話個衰佬唔認數，搞到佢抑鬱。

接受唔到現實嘅Angel遷怒於Ashley，認定呢位艷星就係狐狸精，更加喺人哋官網嘅討論區留低死亡恐嚇：「Ashley最好咪踏足洛杉磯，否則我實搵人打到你見紅！」即將連環做老竇嘅伊雲斯，私生活混亂成咁，試問仲點會打到好波吖？