監躉變模範Dabby 蘭度夫四圍派Love

「我都想做好人！」灰熊大前鋒蘭度夫（Zach Randolph）惡形惡相，曾經衰過偷窺、醉駕及企圖販賣槍械，連監都坐過，看似十惡不赦，但年少輕狂又有誰未犯過錯？外號「Z-Bo」的他為免下一代重蹈自己覆轍，決定洗心革面做個模範Daddy之餘，又開OT教後輩打波兼出錢出力參加「拯救鬥牛犬行動」周圍派Love，想做好人？31歲當然不算遲！

來自單親家庭的蘭度夫家境貧困，試過因為日日着同一條牛仔褲返學被同學恥笑做「盔甲人」，難忍羞辱決定到超級市場偷褲，卒之「斷正」被判入男童院30日，及後又因為企圖販賣槍械幫補家計再次踎監。雖然每次犯事都為勢所迫，但這位灰熊球星就拒絕為自己找藉口，希望用行動教好下一代，避免愛兒Zachariah行自己條舊路。

教阿仔遠離酒精毒品

「Z-Bo」表示：「我冇老竇為自己樹立榜樣，所以更加明白教仔係幾咁重要！籃球唔係一切，我絕對唔會逼Zachariah做咩球星，最緊要係遠離毒品同酒精，積極面對人生。」蘭度夫要教仔，首要條件當然要做個好榜樣，據灰熊球會職員所講，「Z-Bo」周不時犧牲私人時間，開OT特訓小將禾頓（Tony Wroten）及已轉會至騎士的沙比（Josh Selby）。

「蘭度夫日」表揚貢獻

除此之外，蘭度夫不單在感恩節向孟菲斯貧困家庭派火雞，近日更向新奧爾良一間愛護動物中心定期捐款10萬美元（約77萬港元），拯救「差錯腳」誤墮水渠的鬥牛犬。昔日無惡不作，如今到處派Love，母校馬利安高中更每年舉辦一次「蘭度夫日」，表揚這位灰熊球星對社區所作貢獻。

「Z-Bo」所屬的灰熊昨日力戰而敗，作客91:98不敵熱火，明早再次出擊定必找傷兵滿營的魔術出氣，善有善報，作客讓5.5分都要上盤。

蘭度夫檔案

出生日期：1981年7月16日

國籍：美國

身高/體重：2.06米/260磅

位置：大前鋒/中鋒

効力球隊：灰熊

威水史：NBA最佳進步球員（2004）、兩次入選全明星賽（2010、2013）