帶未婚妻出席慈善P 占士粉碎甩拖傳聞

衞冕NBA嘅熱火前晚搞咗個「家庭基金會之夜」，保殊（Chris Bosh）、柏堤亞（Shane Battier）雖然五音不全，但為慈善不惜獻醜引亢高歌，球會總裁萊利（Pat Riley）話今次活動獲得空前成功，為幾個邁阿密慈善機構籌得超過100萬美元（約775萬港元）善款，之不過講到全場焦點，肯定係勒邦占士（LeBron James）同未婚妻莎雲娜（Savannah Brinson）。

赤裸上身大跳《哈林搖擺》

1月尾冇跟「大帝」造訪白宮，全明星周末又各有各玩，一直有傳莎雲娜已經同勒邦占士甩拖，婚都未必結得成，但呢晚佢兩個就糖黐豆一樣齊齊亮相，仲不時玩自拍晒恩愛，用行動粉碎掟煲傳聞。人逢喜事精神爽，睇見速龍球員早排大跳《哈林搖擺》，心情大靚嘅占士亦唔執輸，尋日率領一班熱火隊友跳番鑊勁，查馬斯（Mario Chalmers）扮孖寶兄弟、韋迪（Dwyane Wade）戴熊仔頭套已經夠出位，估唔到赤裸上身兼戴住皇冠嘅占士最爆，跳舞跳到成隻蛤蚧一樣，笑爆嘴！