舊愛翻18年風流帳 米高佐敦私生子曝光

米高佐敦同馬納當拿嘅體壇地位至高無上，佢哋唔單止係各自領域嘅球王，爛滾性格亦似到十足十，最近仲衰埋一堆添！今年4月再做老襯嘅「波神」，尋日被揭發18年前嘅偷食醜聞，佢個陳年舊愛仲搬埋私生子出嚟要求做親子鑑定，誓要追番條風流數鑿米高佐敦一筆；另一位球王馬納當拿早排溝掂童顏小妹妹露絲奧，諗住威番鋪啦，點知新歡原來係雙性戀者，「球王」都算老懵懂咯！

要求法院做親子鑑定

據美媒《TMZ》爆料，「波神」舊愛Pamela上個月7號向喬治亞州富爾頓縣法院提出訴訟，自稱喺1995年同米高佐敦發生關係之後懷孕，翌年6月生咗Taj，要求法院進行親子鑑定，證明「波神」就係Taj嘅親生老竇。Pamela要求獲得Taj嘅全部監護權同撫養費之餘，仲希望法院能夠判Taj用番「Jordan」呢個姓。

現年16歲嘅Taj亦都「出番分力」，日前拍片掟上youtube，直接叫「波神」做老竇，又話好想同「MJ」見吓面，擺明狂Sell溫情。不過話時話，Taj同佐敦真係成個餅印一樣，睇怕「波神」今鋪吟詩都吟唔甩！正所謂人不風流枉少年，山貓班主米高佐敦後生嗰陣係爛蒲，但家陣都修心養性，仲準備喺4月同古巴籍名模伊維狄拉埋天窗，呢個時候先畀人翻舊帳，Pamela真係唔知攞景定贈興！

露絲奧傳懷球王骨肉

至於馬納當拿亦唔好得幾多，呢位「球王」上星期六被踢爆同細佢30年嘅露絲奧擦出愛火花，尋日阿根廷報章《VERY》又刮到猛料，登咗兩幅露絲奧幾個月前激咀河床女足隊友嘅相出嚟，揭發呢位22歲金髮小妹妹嘅雙性戀取向。同馬納當拿反目成仇嘅商人Omar，正正係今次嘅「告密者」，佢向傳媒爆料：「露絲奧成日帶埋河床隊友同一班女性朋友落我間夜店玩，當中起碼半數係男人婆，佢哋肆無忌憚咁玩伸脷、互咀，好激！」露絲奧埋到馬納當拿堆即刻曝光率大增，佢尋日仲向傳媒自爆話有咗「球王」骨肉，如果係真嘅話，52歲嘅馬納當拿都真係「寶刀未老」喎！