潘志豪羅意庭為慈善重逢

潘志豪、羅意庭聯手出戰!兩代香港最強後衞自2009年東亞運後再破天荒攜手落場比賽,參加明晚舉行的「NIKE慈善籃球賽」,為香港「遊樂場協會」的「籃球學院」計劃籌款。「阿豪」更開心能夠與CBA前隊友兼寶島名宿周俊三重逢,可以趁機以波會友!

早前受甲狀腺問題困擾的「阿豪」,最近亦因身體不適缺席了超級工商盃,現時仍未能做運動,不過他稱今次做善事,落場開心玩玩無所謂:「家陣好番好多,好乖咁按時食藥,之前工商盃都有落場打一陣。其實狀態都係麻麻,但相信觀眾睇得開心都唔會介意吧!」

樂觀阿豪有病都唔退休

曾北上打CBA,於香港籃壇成就非凡,可是年屆32歲仍是當打之齡卻突然患病,更一度要跟籃球「分手」,「阿豪」稱會樂觀面對:「好突然,沒諗過咁嚴重,其實我好想打波,可惜力不從心,無力打,現在希望唔會休息太耐,以免影響即將舉行的賽季。」被問到有沒有一絲退役的念頭,這位一代後衞斬釘截鐵向球迷大派定心丸:「唔會退!得咗呢個病反而令我更珍惜打波嘅時間,有時我會想,睇見宋方、吳柱業等名將一個個退下來,咁幾時到我呢?我發覺我未想退,除非有朝一天打唔到,被人淘汰先至退喇!」

阿庭承諾使出渾身解數

羅意庭是繼「阿豪」後,另一位進軍CBA的港人,今次兩人合作,預料有不少火花,他回憶應該有3年沒跟「阿豪」同隊:「對上一次應該係東亞運,今次再一齊合作感覺特別,我都想送一場精彩比賽畀入場球迷欣賞,簡單講就係身上有乜絕招都會施展出嚟,總之出盡法寶。」「阿庭」効力的福建潯興賽季已完結,故他將會留港一段時間,稍後如無意外,將會替南華出戰銀牌賽事,今場可說是「阿庭」於新球季在港的賽前熱身。

兩人成功於CBA佔一席位,相信是不少香港年輕人的榜樣,「阿豪」就鼓勵若想進軍CBA,目光一定要遠大:「本地有好多好球員,但係去到某個水平就會認為自己已經夠打,放鬆落嚟。其實CBA嘅水平更高,所以應該要有更高要求,唔好限制本身嘅進步空間。」「阿庭」亦望透過今個比賽,讓入場的小朋友感受到籃球樂趣,身體力行啟發更多有潛質的人。

賽事資料

日期:2013年2月27日

地點:修頓室內場

時間:晚8:00(門票已售罄)

洪家健

一眾港「籃」聽晚激戰修頓,球迷又點可以錯過?

羅意庭 彈弓人

潘志豪 超級後衞

留棟梁 入樽王

陳兆榮 港隊新星