JR自信爆燈變身Cheap衫潮人

用「蔗渣價錢燒鵝味道」去形容JR史密夫（J.R.Smith）最適合不過，這位紐約人後備今季只得不足300萬美元年薪，不過就打出超水準，有望競逐「最佳第6人」殊榮。JR無論打波及着衫都抱住一個宗旨，那怕球員抑或服飾價值再低，只要夠自信就能夠發熱發亮，難怪JR着衫別具一格，更計劃踩過界開設個人時裝品牌。

最近登上時尚雜誌《Bleu》封面的JR，受訪時大談潮流心得：「着衫同打波一樣，我永遠唔會畀自己鬆懈落嚟，就算你揸住件好Cheap、過晒時嘅衫，只要你肯畀心機配搭，一樣可以化腐朽為神奇做潮人。我嘅夢想係3年之內做老闆，推出自家品牌服飾，並且會走平價路線，等窮人都可以着靚衫！」

JR出名是籃壇潮人，反觀熱火控衞查馬斯（Mario Chalmers）論身形及外貌都只屬「普通料」，偏偏日前就獲美國雜誌《People》選為「阿拉斯加最性感男士」，認真無厘頭！之不過講到場上表現，查馬斯就非常稱職，昨晨就貢獻13分及3次助攻協助熱火主場以107:97擊敗湖人，明早主場讓拓荒者8.5分當然信得過。（now678台及中央5台周三早上8:30直播）