小城球隊奇招救市 3毫子有得睇76人

小城市球隊蛇年奇招博翻身!湖人、熱火陣營粒粒皆星,主場出擊想有平飛?No Way!可憐一眾小城市球隊就為波飛滯銷「牙痛咁聲」,當中東岸魚腩山貓就最有諗頭,推出「選秀排名定票價」做噱頭吸客,公鹿亦推出超筍「波飛加熱狗套餐」刺激入座率,期望主場不再冷清,熱熱鬧鬧過蛇年!

山貓新秀籤定季票售價

經濟不景氣,不少NBA球隊都面臨入座率下滑問題,有球迷前日就透過購票網站StubHub狂掃18張76人波飛,以0.72美元(約5.5港元)就可以「霸晒成行」,唔計運費,一張飛只需3毫子!米高佐敦(Michael Jordan)的籃壇地位至高無上,奈何旗下隊伍山貓就一沉不振,目前於東岸墊底,宣傳部於是將計就計,度到「選秀排名定票價」絕橋務求殺出新血路。

公鹿小童波飛 熱狗只賣7.8

球隊成績愈差便愈有機會獲得高順位選秀權,山貓於是以首個選秀排名作為波飛定價做噱頭,若球隊能夠獲得狀元籤,500位球迷來季便可以場均1美元購買山頂季票,榜眼2美元、探花3美元,如此類推。計劃推出之後,會方已收到超過2,000份申請參加表格,反應相當熱烈。

另一支東岸隊伍公鹿有望殺入季後賽,不過密爾沃基並非大城市,今季入座率已跌至聯盟第4低,會方遂舉行「公鹿之夜」大酬賓,14歲以下小童波飛及場內熱狗均以1美元超筍價發售,希望球迷帶埋一家大細到場支持,擺明走家庭路線。

送走普林斯 活塞攞嚟衰

以為平就多人吼?活塞即使出動「買季票獲球會名宿陪打Golf」奇招甚至免費派飛,奧本山王宮球場依舊大把吉位,位於麻薩諸塞州的史密夫大學經濟學家森巴列斯,上周就主動塞錢落活塞個袋:「派飛會嚴重打擊價格結構,試諗吓隔籬位球迷係拎免費飛入場,你就用正價買飛,你嬲唔嬲先?球迷唔入場因為上網睇到波,球會應該畀番啲喺屋企感受唔到嘅嘢回饋入場球迷,例如送Tee、抽獎、泊車優惠,咁反而仲實際。」

但根據《ESPN》統計,今季活塞場均有超過7,700個吉位,偏偏會方就「唔識做」,早排將効力了11年的老臣子普林斯(Tayshaun Prince)送走。由於交易事出突然,不少Fans都懵然不知,當日活塞作客不敵溜馬,賽前1位球迷等極都未等到普林斯出場,得知偶像已過檔灰熊後憤然掟波衫發洩,活塞今鋪辣慶Fans,想挽救入座率都難!

山貓(左)隊波點執都唔掂,再係咁落去入場人數隨時衰過76人(右)。(美聯社圖片)

公鹿(左)戰績唔錯,可惜位處小城市,所以同活塞(右)一樣要諗計吸引球迷。(美聯社圖片)