撈副業掂過掟標槍萊琳堅持唔轉行

氣氛隨時熱鬧過農曆年嘅森巴嘉年華，喺上周五正式展開為期5日嘅狂歡，曾經喺2010年被選為全球最性感女性嘅「標槍女神」萊琳弗朗歌，據報會喺日內殺到里約熱內盧，將嘉年華推上高潮！呢位巴拉圭女神仲話自己雖然好多Model工作，但就會繼續專心標槍事業，誓要再訪巴西，第4度出戰奧運！

上月中宣布應巴西啤酒商brahma邀請，盛傳收到成200萬巴西雷亞爾（約785萬港元）「戲金」嘅萊琳弗朗歌，日內就會夥同著名影星美瑾霍絲出席嘉年華，事前萊琳仲話會學跳森巴舞，希望到時大派用場添。查實以佢索爆美貌同Fit爆身材，想當年喺08京奧都可以輕鬆一戰成名，依家都肯定會成為各界焦點啦！

被踢爆搭上田徑隊助教

萊琳人氣真係好勁o架，最近佢仲畀一本雜誌爆出新戀情，上晒封面。呢個報道話佢同智利富商男友啱啱甩拖，月初仲畀人影到佢同巴拉圭田徑奧運隊助教Ivan Almeida喺邁阿密秘密度假添。呢單嘢曝光後，雖然兩人到依家都唔肯回應巴拉圭傳媒，但從佢兩位嘅親密行為及線人來料，當地狗仔隊就一口咬定佢哋有嘢喇。

有冇新歡都好啦，萊琳接Job接到手軟係不爭嘅事實，由於近年佢喪做Model行天橋，有次仲搏到露點演出添，反而喺運動事業方面冇乜進展，又難怪被人質疑佢唔會再做運動員嘅。

疑似有新仔而心情靚靚嘅萊琳，日前受訪就終於嚟個真情剖白：「以前我揀體育，依家係模特兒揀我。無論點樣，我都會以標槍事業為首選。」萊琳仲補充話會繼續努力，以進軍2016里約奧運為目標，希望繼今次嚟到里約出席嘉年華後，下次可以重臨「舊地」，出現喺田徑場上面喎。

出生日期：1982年3月1日（30歲）

國籍：巴拉圭

身高/體重：1米74/54公斤

體育項目：標槍最佳成績：57米77

曾參與奧運：04雅典（第42名）、08北京（第51名）、12倫敦（第34名）

主要運動成就：南美青年賽金牌（1998、2001年）、南美U23錦標賽（金牌）

其他成就：2006巴拉圭小姐選舉亞軍、2010全球最性感女士