小牛勝率唔過5成唔剃鬚

小牛今季戰績一落千丈，一班手足決定留鬚明志，球隊勝率一日未達5成就禁止剃鬚！不過魯域斯基（Dirk Nowitzki）成面鬚搞到老婆Jessica Olsson「詐晒型」，難怪昨日又發威率領小牛以116:91大勝勇士啦！

魯域斯基老婆詐型「焗發威」

查實NHL（北美冰球聯賽）球隊一向有留鬚明志傳統，據《達拉斯晨報》透露，美奧（O.J.Mayo）及卡特（Vince Carter）兩位小牛球員有樣學樣，兩個禮拜前已發起「留鬚行動」，每位手足都熱烈響應，偏偏魯域斯基就最不合作。

「德國槍」稱：「我都有形象，啲鬚生到落頸好樣衰，老婆已經詐晒型！」魯域斯基昨日攻入15分，帶領小牛主場以25分之差大炒勇士，不過該隊勝率暫時只得42.9%，「德國槍」要「氹番」老婆仍要繼續努力，明早小牛主場讓近況飄忽的鷹隊2.5分當然要上盤。（now678台周二早上9:30直播）