火箭熊大便搞到超級碗停電？

火箭熊是超級碗停電幕後黑手？巴爾的摩烏鴉砌低三藩市49人捧走超級碗，比賽期間停電至今仍是球迷茶餘飯後的熱門話題，就連NFL聯盟亦未有公布真正原因，不過火箭會方就指球會吉祥物是熄電掣元兇，真係信不信由你！

登台向華人拜年

根據火箭官網發布的短片，吉祥物火箭熊當日與柏臣斯（Chandler Parsons）齊齊睇超級碗，由於火箭熊食得太多爆谷搞到肚痛，但又不想錯過這場體壇盛事，於是便熄電掣「辦公」辦足34分鐘，累到柏臣斯及全球球迷等餐懵。

火箭熊幽大家一默之後急急腳「補鑊」，昨日趁大年初一到中華文化服務中心「登台」，與休斯敦市長安妮絲（Annise Parker）齊齊向華人球迷拜年。今次春節遊園會盛況空前，台上拉起印有「新年快樂」字樣的橫額，期間火箭熊不單止大派紀念品，更為一眾Fans簽名、合照，勁抵錫！