一票難求波飛炒到2萬4

第47屆超級碗變「兄弟碗（Brother Bowl）」！細佬占夏保帶領49人，烏鴉則由哥哥約翰夏保領軍，今屆賽事破天荒由兩位兄弟教頭互鍊，一場家族廝殺肯定好睇過戲，況且烏鴉於第35屆賽事「一擊即中」，49人5次躋身超級碗都奪冠而回，兩支超級碗不敗之師對撼惡戰難免，之不過由雙方球員掀起的一場撲飛潮反而成為賽前焦點！

今戰於平治超級圓頂球場上演，即使場館可容納近8萬觀眾仍一票難求，據聞平均票價已炒至3,100美元（約2.4萬港元），莫講話球迷，就連球員都難撲飛。美媒《PFT》透露，每位49人及烏鴉球員只獲分發兩張免費飛，並規定只可以正價購買極少量入場券，鑑於今戰至平波飛價格都要850美元（約6,600港元)，不少球員都花費了數萬美元撲飛，有球員更向傳媒稱撲飛壓力比爭標更大。

烏鴉炒啦啦隊「老將」

查實今場激戰大把睇頭，烏鴉王牌線衞劉易斯戰罷今仗便退役，這位37歲基督徒賽前接受《體育畫報》訪問時，一句「上帝會關心哪方贏得超級碗嗎？」成為美國至潮口頭禪。除了劉易斯之外，為烏鴉効力了5年的「老將」Courtney Lenz亦計劃於今場超級碗後轉行離開啦啦隊界。之不過烏鴉就認真冇人情味，竟然因為Courtney重了兩磅而禁止這位25歲索女出席這場盛宴。有球迷就於facebook設立一個名為「將Courtney帶返超級碗」的群組，向烏鴉會方施壓。

49人三將夜蒲睇脫衣舞

至於49人四分衞基爾巴歷就於大戰前夕搭上J.Marie，屆時這位索模將到場為愛郎打氣。另外美國八卦網站《TMZ》刮到猛料，跟到3位49人主將包括跑鋒哥利、外接手卡切爾及線衞韋利斯夜蒲，到新奧爾良脫衣舞夜總會Penthouse Club梳乎，於大戰前夕鬆一鬆，但驚唔驚腳仔軟呀？