D-Will助攻做善事 希拔派錢「鞏固」防守

東岸雙星燒錢求佳績！今季助攻數字下滑的籃網後衞迪倫威廉士，為證全明星地位度到絕世好橋，決定每交出1次助攻就捐150美元翻新球場，既可推動自己，又可帶挈布魯克林社區，一舉兩得；溜馬中鋒希拔亦唔執輸，同樣出動銀彈政策激勵隊友打好防守！

每次助攻捐1,162蚊

以助攻耍家見稱的D-Will，今季錄得自新秀賽季以來最低助攻數據（場均7.7次），加上不敵朗度失落東岸全明星正選席位，該位籃網球星為催谷表現，決定與會方合作進行「Brooklyn's Got Wings」計劃，每交出1次助攻便捐150美元（約1,162港元）予環境規劃局作翻新球場之用。

迪倫威廉士昨日向《SlamOnline》表示：「唔少美國街場嘅環境都好惡劣，爛地、爛籃板乜都齊，有關方面為免波友亂入樽搞破壞，仲特登將個籃框升高到11呎高，咁樣好影響小朋友嘅發展，捐錢可以令我喺場上更有推動力，二來亦可以為社區出番分力，搞番靚啲場！」D-Will會翻新鄰近巴克萊球場附近的8個籃球場，今季目標至少要籌到10萬美元（約77萬港元），捐錢行動將維持兩個球季。

對手少過80分有錢派

至於季前與溜馬簽訂一份為期5年、總值5,800萬美元新約的希拔，就決定分「金」同味激勵隊友！據該名溜馬中鋒所講，只要對手得分少於80分，就會向每位後備球員派發100美元（約775港元）作獎勵，激勵一班後備兵打好防守，結果上周三溜馬即以103:76大勝山貓，希拔亦兌現承諾，向漢斯堡、麥佳亞及賓迪格夫幾位後備兵「派彩」。