正印男友爆大鑊：Mandy吼奧斯爾純粹為錢！

以為搵到真愛，點知遇上情賊！皇馬球星奧斯爾日前被狗仔隊影到同德國歌星Mandy Capristo暢遊馬德里，仲話呢位德國國腳終於擺脫3年情傷添。可惜單料爆出唔夠幾日，有傳媒就搵到Mandy個Rapper舊男友Kay One攞料，發現Mandy疑似一腳踏兩船，兼且只當奧斯爾係水泡，只係為錢先同佢一齊！

Kay One寸奧斯爾唔夠Man

兩年前同Mandy分手嘅Kay One，向《圖片報》爆料話佢哋已經舊情復熾咗一段日子：「我哋喺舊年9月開始聯絡，喺佢同奧斯爾撻着之前，我哋已經喺番埋一齊。Mandy同我講過，奧斯爾唔係佢杯茶，我諗佢可能有嘢呃你哋班記者。」有傳媒就猜測，正喺歌壇上位嘅Mandy，根本係睇中大把身家嘅奧斯爾，想泊個好碼頭。同時，有人摷番Mandy早排喺雜誌《Focus》專訪，發現佢原來係「無仔不歡」！

Mandy當日話：「我覺得單身生活真係好垃圾，如果想開心，一定要有人同你分享，特別係我夜晚喺酒店瞓覺嗰陣，我好想畀人攬住！」訪問入面仲提到佢嘅擇偶條件：「我唔使個男人好完美，但一定要夠Man，最好有強壯嘅臂彎同膊頭。」奧斯爾夠唔夠Man？Kay One就認為唔夠喇，大家又點睇呢？