倫敦常規賽星光熠熠

英超球星玩轉NBA倫敦賽！昨晨喺O2體育場上演嘅NBA常規賽，紐約人憑安東尼攻入全場最高嘅26分，「作客」以102:87擊敗活塞，不過贏波功臣「甜瓜」就被場邊嘅球星搶晒風頭。依家喺阿仙奴跟操嘅紅牛前鋒亨利，同紐約人天字第一號球迷史碧奇李合照、沙格拿客串做現場MC，就連胡禮菲臘斯、侯活、艾殊利高爾、梅姆巴同大衞雷斯等等都係座上客，不過講到最受注目，肯定係齊齊攜眷出席嘅熱刺鋒將丹普西，同埋阿士東維拉前鋒戴倫賓特！

「大賓」拖列治維舊愛撐場

丹普西老婆Behtany兩年前幫過《體育畫報》影過一輯泳裝照，嗰次仲大膽到玩埋人體彩繪，所以昨晨現身坐爆18,689人嘅O2體育場都幾哄動，期間唔少男Fans都上前搵佢合照，難得老公丹普西一啲都唔Mind，勁有風度！至於撬咗西布朗中堅列治維牆腳嘅戴倫賓特，昨仗亦罕有帶埋索爆女友Kirsty Maclaren亮相公開場合，唔知列治維見到「大賓」咁揚，會唔會眼火爆呢？