占士唔吼C朗舊菜 力鎅「阿州」小姐

「大帝」想撬「全明星女友」？啱啱躋身全明星賽東岸正選嘅勒邦占士名成利就，揀女梗要門當戶對啦！同C朗傳過緋聞嘅米內蒂夠索喇啩？點知早排喺邁阿密海灘一樣慘食「大帝」檸檬，美媒踢爆原來呢位熱火球星心有所屬，正力「追」阿拉巴馬州小姐Katherine Webb，明撬佢個「大茄」男友麥卡朗牆腳！

米內蒂幫貝老管理「後宮」

話說米內蒂本月頭去咗邁阿密度假，仲以性感泳裝Look去海灘曬太陽，噴血身材惹嚟大班麻甩佬嘅目光。咁啱得咁蹺，熱火球星占士突然出現，米內蒂即時搔首弄姿，一個箭步衝去搵「大帝」吹水兼乘機影相、攞簽名，點知講唔夠兩句，占士就叫兩位保鏢將佢夾走，咁樣送秋波都被占士當透明，米內蒂唔冇癮就假啦！

高比仔壓占士膺明星賽票王

曾經幫意大利前總理貝魯斯干尼掌管「後宮佳麗」，上年年尾又被指同C朗喺馬德里一間酒店偷情，私生活混亂到咁，難怪「大帝」唔吼米內蒂o架喎！嗱，占士就鍾意Pure啲嘅女仔，Katherine Webb就係佢杯茶嘞！呢位2012年阿拉巴馬州小姐，本月8號出席全美大學美式足球賽冠軍戰，幫効力紅潮嘅男友麥卡朗打氣，咁啱電視鏡頭捕捉到佢喺觀眾席個緊張樣，就係呢幾秒令佢人氣急升，短短一晚佢個twitter就多咗15萬位「追隨者」，一夜間成為「全明星女友」。

喺15萬位「追隨者」當中，眼利嘅美媒發現占士係其中一位，更有消息指雙方已互傳短訊，有記者將呢個消息話畀麥卡朗知，呢位四分衞當堂打咗個凸，唔通驚「大帝」搶咗佢女友？年尾就做老襯嘅占士，係咪想趁婚前放肆一下真係得佢至知，呢位熱火球星今季表現勇銳，真係情場、球場兩得意，雖然佢喺昨晨公布嘅全明星賽投票輸畀「票王」高比拜仁，但尋日就喪入39分帶領熱火作客以99:90擊敗湖人，鋒芒蓋過「小飛俠」，乜氣都出番晒啦！