艾迪居里前妻 老闆球員都係佢

根據BBL聯盟公布嘅統計數字，8支球隊平均有200人遞交試訓表格，仲有唔少前NBA球員入紙申請做班主，證明BBL係幾咁有吸引力。之不過講到聯盟風頭躉，肯定非芝加哥慾望隊班主兼球員歌莉莫屬！

商界強人圓兒時夢想

歌莉係前紐約人中鋒艾迪居里嘅前妻，呢位辣媽曾經因為用皮帶虐打個仔入獄，係就係冷血啲，但喺法蘭克福搞地產生意嘅佢，無可否認係一位轉數極快嘅商場女強人。幾間地產公司揸手，又入股做埋慾望隊老闆，周身唔得閒嘅歌莉仲決定做埋球員，咁鬼搏全因為實現兒時夢想。

現年30歲嘅歌莉話：「我喺高中時代係籃球隊猛將，如果唔係早早同艾迪居里結婚，我根本唔會放棄籃球。」歌莉仲話，決心參戰BBL係想畀人睇到佢嘅另一面，同時希望用行動證明呢個聯盟嘅球員唔係花瓶，即使着住比堅尼落場一樣可以打好波，為女性增光！