Bikini Basketball性感女郎肉搏籃球場
比堅尼Crossover籃球？夠噱喎！NBA常規賽打到如火如荼，另邊廂嘅BBL（比堅尼籃球聯賽）亦密鑼緊鼓進行「肉」女大招募，呢個打正露肉旗號嘅革命性聯盟，雲集學生妹、模特兒、軍人甚至前WNBA好手，唔單止個個都睇得又打得，佢哋仲會以比堅尼Look落場展開大激鬥，務求帶畀球迷前所未有嘅視覺享受，開創性感籃球先河。各位觀眾，睇波喇喂！
鑑於內衣美式足球搞到有聲有色，唔少生意佬食住條水發展「睇肉」運動，當中最有Noise必數籌備咗超過1年嘅比堅尼籃球聯賽。目前擁有8支球隊（包括阿特蘭大蜜桃、芝加哥慾望、荷里活索女、洛杉磯寒冰、邁阿密辣妹、紐約動人、奧蘭多貓女郎、明尼蘇達薄霧）嘅BBL暫定5月底至6月頭先開咧，聯盟官網未搞掂，列強組軍亦未完成，但全球媒體同麻甩佬已經（目及）到實一實，點解？試諗吓平時喺沙灘先至見到嘅比堅尼索女，家陣香汗淋漓咁喺籃球場上打快攻，齋講都覺得震撼。
學生 WNBA球員都報名
8支球隊近期搞緊球員大招募，學生妹、Model、軍人、單親媽咪甚至前WNBA球員都踴躍報名，真係乜嘢背景嘅女都有。咪以為呢個聯盟派啲女出嚟只係騷身材，查實佢哋不知幾專業，美國籃球雜誌《Dime》早排就派記者去採訪，發現列強單係試訓就分4個階段，先係喪跑兼跳健美操，跟住就考射術、上籃同走快攻，然後就分隊鬥波並由教練評估實力，據講質素同籃球底子好過唔少男仔，唔係講玩o架！
要識扭氣球公仔跳彈床
據芝加哥慾望總經理派斯所講，每隊波最多有21名球員，當中起碼有14人具備一定戰鬥力，另外7個人就要識扭公仔氣球同跳彈床娛賓，總之就睇得、打得又玩得。
正所謂萬事起頭難，由一班着比堅尼嘅囡囡比賽始終好踩界，加上部分球隊仲未有主場，佢哋好多時要借大學、高中嘅場館練波，鑑於備受女性組織同部分媒體批評，唔少校方都以意識不良為由拒絕借場，令一班索女要喺街場練波。
面對眼前嘅困難，聯盟主席兼辣妹班主麥艾化就話冇有怕：「球場、電視直播同贊助問題都傾得七七八八，冇嘢可以阻到BBL開咧。着比堅尼比賽係吸引觀眾嘅噱頭，但我哋唔淨止着重外表，唔少試訓球員都係前校隊甚至WNBA球員，我希望有朝一日聯盟嘅水平可以拍得住WNBA。」
媒體反應
《邁阿密先驅報》：如果球會商品大減價標明「裝備75% Off」，咁少布仲有得除咩？都幾意淫o架喎！
《新英倫體育網絡》：比堅尼從今開始將帶嚟前所未有嘅樂趣。
《國際商業時報》：比堅尼籃球之後會衍生啲咩出嚟？裸體籃球聯賽？
《國家雜誌》：時勢迫使女子運動員要着比堅尼比賽先有錢收，佢哋唔係靠球技，而係靠近乎全裸嘅姿態先吸引到大眾注意。