罵戰揭發安東尼分居兩個月

一場罵戰,揭發一場婚姻危機!塞爾特人周二砌低紐約人場波,加納特猛咁廢噏影響安東尼嘅表現,當中一句「你老婆嗒起上嚟好似蜂蜜燕麥圈嗰種味道」就激到「甜瓜」紮紮跳,查實呢類Trash Talk(垃圾話)喺籃球場上好常見,但美媒就踢爆原來安東尼兩公婆出現咗感情問題,正所謂崩口人忌崩口碗,唔怪得安東尼咁躁啦!

真人騷女星老婆La La今季極少入場睇波撐安東尼,twitter亦甚少提及老公,美媒於是明查暗訪,據《紐約每日新聞》報道,La La元旦日喺南佛羅里達州開狂歡Party,冇預安東尼不特止,就連結婚戒指都冇戴,從而揭發佢兩公婆已經分居超過兩個月,即使「甜瓜」幾咁努力挽救,La La都係唔肯返屋企。

加納特喺安東尼傷口灑鹽,搞到「甜瓜」失控想開佢波,卒之畀聯盟罰停賽1場,今早造訪溜馬場波無緣披甲。家陣安東尼成肚火,聽朝復出仲唔搵公牛出氣咩?紐約人主場讓3.5分一於捧上盤。