伊雲斯懵盛盛做老竇？

NBA球星有名有利，特別多狂風浪蝶殺埋身。好似2010年「新人王」泰拉基伊雲斯咁，個樣戇居居照樣搵到食，奈何就搞出個大頭佛，最近被傳搞大艷星Ashley Logan個肚，對唔住青梅竹馬女友不特止，今鋪仲懷疑做咗「行家」巴朗戴維斯同貝理雅襟兄弟，懵盛盛榮升老竇！

昨晨有消息話掌管帝王嘅馬洛夫家族準備賣盤，以破聯盟紀錄嘅5億美元（約39億港元）將球會賣畀以漢臣同保曼為首嘅一個西雅圖財團，一旦成事，帝王最快會喺來季搬竇到西雅圖，薩克拉門托嘅球迷唔Down就假咯！衰嘢一浪接一浪，據美媒《fullcourt》爆料，1位叫Ashley Logan嘅惹火艷星自爆有咗，日前仲喺twitter「鋪」咗幅圖，話BB個老竇好高、好有才華，結尾仲加咗個皇冠Icon，唔少傳媒都揣測，呢個Icon就係暗示効力帝王嘅伊雲斯係經手人。

做巴朗戴維斯 貝理雅襟兄弟

Ashley百足咁多爪，撈過MV「大茄」、做過Model，最近就喺電視節目行行企企大騷火爆身材，不過講到至耍家始終係溝仔，除咗搭上過饒舌歌手Red Cafe同DJ Whoo Kidd之外，盛傳仲同前紐約人控衞巴朗戴維斯及馬刺中鋒貝理雅有一手。美媒又話呢位豪放女有錢乜都肯制，500美元（約3,900港元）就可以「陪瞓」，Ashley密友話佢根本唔Sure經手人係邊個，伊雲斯今鋪隨時被屈食死貓！

沙朗布朗瞞老婆偷鎅粉絲

查實伊雲斯有個拍咗好多年拖嘅女友Corina，呢位前帝王啦啦隊索女家陣自己開班教小朋友跳舞，又清純又聽話，伊雲斯咁都唔珍惜，到時畀女飛真係喊都無謂！其實籃壇衰佬又點止伊雲斯一個？2010年尾先同R&B歌手Monica拉埋天窗嘅沙朗布朗，被踢爆喺2011年頭Send短訊問1位Fans攞電話，有冇下文就得佢兩個至知，但布朗嘅好好先生形象就蕩然無存咯。