A米發放正能量 圓哥哥遺願

一場車禍，奪去史杜迪米亞哥哥Hazell的性命，上周六乃Hazell生忌，「A米」決定出錢又出力，延續哥哥樂於助人的精神！昨日「A米」接待30位小朋友入場睇波，賽後又搞聚餐分享人生道理，發放正能量為亡兄完成遺願。

出動校巴親自接小朋友

Hazell去年2月因車禍離世，史杜迪米亞隨即於右眼角下方紋上流淚圖案作悼念，上周六又在twitter上載與Hazell生前的合照，足證兩兄弟手足情深。「A米」為延續胞兄回饋社會的遺願，昨日出動校巴，親自接載30位來自佛羅里達州的小朋友入場睇波，之後仲請食飯、派自傳《STAT：DOUBLE TEAM》，30位「幸運兒」可謂收穫甚豐。

紐約人明鬥綠軍捧上盤

史杜迪米亞向《ESPN》表示：「Hazell生前對家庭同朋友都好到冇得彈，我想幫佢延續呢股正能量，所以我向班小朋友分享人生道理，話畀佢哋知讀書有幾重要，同埋點樣去追逐夢想。」「A米」好心有好報，他昨與安東尼合力轟入51分，帶領紐約人作客以114:106砌低魔術，明鬥今非昔比的「綠軍」塞爾特人可秤先，主場讓4.5分捧上盤。