保特多得前女友「股」勵

保特倫奧奪金一味靠「股」？！據英國《太陽報》爆料，原來「閃電俠」上年喺倫奧出戰之前，都有Send短訊氹模特兒女友Megan Edwards攞相，咩相？之唔係Megan嘅Pat Pat相囉！呢位「牙買加飛人」話靚籮可以激勵士氣，卒之兩破紀錄、蟬聯三金，真係「股」佢唔到！

眾所周知保特係Die Hard曼聯躉，估唔到佢對巨躉一樣情有獨鍾。上年8月5日係倫奧100米決賽，Megan為咗幫愛郎打氣，賽前特別Send上「影後」肉照，兼且語帶挑逗咁話：「諗住我個Pat Pat衝線吧！」隨即回番句「我一定做得到」嘅保特果然如有神助，以9秒63蟬聯「百米飛人」打破奧運會紀錄。

場場要攞相推動跑快啲

保特打蛇隨棍上，出戰200米前又再求相：「需要一張相，推動我200米更有動力跑快啲。」雖然Megan唔記得Send相搞到保特「囉囉攣」，但佢依然順利摘下第二金，之後保特出戰4x100米接力爭取連續兩屆奧運「大三元」前夕，依然咬住女友個籮唔放，再發短訊請求Megan「幫拖」：「需要另一張相幫我取勝及打破世界紀錄。」卒之保特同隊友以破世界紀錄成績奪金，賽後保特仲出咗張頭等機票畀Megan飛去倫敦甜蜜慶功。

保特同現年22歲嘅Megan上年喺「時裝騷」撻着，二人一直打得火熱，不過雙方聚少離多，女方終於喺上年聖誕前提出分手，但Megan就話佢哋依然係好朋友，仲有繼續互Send短訊聯絡添！