單車選了我一生最幸福黃金寶

「單車揀咗我，係我一生中最幸福嘅事！」一個車架兩個轆，改變了黃金寶的命運！自90年加入香港隊，22年來風雨不改，每天踩、踩、踩……義無反顧得有點傻，但正是這份至死不渝的堅持，才令他由寂寂無聞屋邨仔，變成受盡萬千寵愛的「亞洲車神」！在這條「不歸路」上贏過、跌過、笑過、哭過、痛過……踩到「終點」這刻，「阿寶」回望過去無限感恩：「單車就係我信仰，佢帶畀我嘅嘢超乎想像！」如果當年沒有投身單車事業，你依家會點？「我諗都幾大鑊！哈哈哈……」

主角當然要壓軸出場！今日是2012年大除夕，找上月退役的黃金寶來回顧與展望最夠分量。訪問當日，走入「阿寶」家門前，就見到擺放着大大小小共4、5部單車，還有頭盔、零件四散，果然是「車癡」一名。適逢他趁長假執屋，書房內遍布陳年舊照和剪報，「阿寶」指着大相架內的「珍藏」笑個不停：「呢張最o靚，應該得18、9歲，你睇我個樣！」「呢張就係攞彩虹戰衣嗰場車，我好鍾意！」「呢張贏完廣州亞運嗰陣影，甫士好娘啊！」

凝望滿載車手生涯足印的一幅幅老相片，連黃金寶都說：「咁就20幾年，過得真快。以前日日練車，默默耕耘，要跟車隊生活，長期出外，好老實，如果要重新嚟多次，我都唔敢講可以做到。」

「『阿寶』更坦承沒想過踩足22年：「最初睇死沈教練只係嚟幾年，哈哈，所以咪講『你教到我幾耐我咪跟你幾耐』囉。」

揭開這句經典對白「謎底」，原來好搞笑，只是有誰料到，師徒承諾一守18載！

唔係完美、但冇遺憾

打從91年揚威亞青賽，「阿寶」年年獲獎無數，5次征戰奧運、3奪亞運金牌、3摘全運桂冠、甚至「踩」上世界之巔，獎牌、獎盃多到一個閣樓都「放唔晒」，即使在2012年，39歲的他都沒交白卷，3月重奪亞洲賽錦標，首披代表亞洲No.1的「白色戰衣」，8月倫奧公路賽以第37名衝線，奧運之旅亦算「完」滿，難怪他用「唔係完美、但冇遺憾」去總結22年成績：「最開心係能夠將興趣變工作，由青少年組踩起，走完運動員應走嘅路，得到人生鍛煉，要贏嘅比賽已經贏到，連世界冠軍都攞過，其實早就超標完成（目標）。

「幾年前亦有朋友叫我『見好就收』，但我想嘗試處身埋走下坡嘅逆境，等日後轉做教練有更多經驗輔導運動員。」

「人無完美，贏晒固然更勁，但我已經好好，起碼期間冇遇過大意外，唔係因受傷被迫走，都算『光榮引退』，OK啦，又點會有遺憾呢！」

「真係唔敢話自己係成功運動員」

上月環太湖賽後卸下戰袍，黃金寶第一次享受近2個月長假，但每天仍會踩車鬆腳，他對單車的愛，是你我無法理解的：「見到架車，好似一定要踩吓先安樂，真係好鍾意，所以就算明知冇今日（成就），畀我再揀一次，我一樣會行呢條路。好多人有宗教信仰，對我嚟講，單車就係信仰，佢帶畀我好多好多，超乎想像，不單止是獎牌榮譽，仲決定我人生，影響我思維、行為。」如果冇踩車，你覺得自己條路會點走？「阿寶」認真想了3秒：「我諗都幾大鑊！哈哈哈……屋邨仔，書讀唔成，脾氣又臭……真係唔敢想像，畀單車綁住咗，反而令我專注做事，單車揀咗我，係我一生中最幸福嘅事！」

當然，幸福非必然，「阿寶」風光背後的付出和犧牲，絕不是人人做得到：「我踩過5屆亞運，除咗第一次（第4），之後4屆公路賽贏到3金1銅，諗番轉頭都覺得『恐怖』。」驕傲、自豪嗎？「冇考慮咁多，成功？我真係唔敢話自己係成功運動員，我只想講，我所謂嘅『成功』方法其實好簡單，冇秘密，亦唔神化，最重要肯投放時間，按部就班，唔可以太急進，練兩年冇成績就話退役，我成日同佢哋（師弟）講『人有你要有，人冇你更加要有』，犧牲一定要，如果衡量過唔得寧願一刀切，千祈咪一邊做一邊怨，到頭嚟乜都做唔成！」

市民支持開心過攞獎

多年奮鬥與非凡成就，早為黃金寶贏得「亞洲車神」美譽，惟他對「車神」這個稱號卻有保留：「咁叫梗係唔係幾好啦！不過都知好多人錫我，不論觀眾、車迷、讀者；自己成績未必係香港體壇最好，好多運動員都贏過亞運金牌，甚至世界冠軍，唔知點解香港市民對我特別好，可能係一種緣分。」

「這位香港『寵兒』愈說愈High：『曾經有基層市民同我講：『阿寶，你好乜勁呀！』雖然中間夾咗個粗口字，但你知佢係讚緊你，支持緊你。』

「能夠得到社會唔同層次朋友嘅認同、關心，係另一樣我覺得好幸福嘅事，好多時，呢啲額外收穫仲令我開心過比賽攞獎！」

最後，問「阿寶」可有計劃出自傳，他直言「唔想為出而出」：「之前都有人話幫我寫書，沈教練亦希望我同年輕一代分享奮鬥故事，不過只係齋寫訓練時間表，紀錄比賽成績嘅話，好冇意思，如果要寫（自傳），我想帶出正面訊息同人生觀。」場內場外皆典範、渾身發放正能量，黃金寶又何嘗不是香港體壇的福氣呢！

「阿寶」光輝歲月

單車威水史

‧90年加入香港隊

‧91年亞青公路賽摘金一夜成名

‧3奪（98、06、10年）亞運個人公路賽金牌

‧3奪（97、01、09年）全運會個人公路賽金牌

‧2奪（01、12年）亞洲賽個人公路賽金牌

‧5次（96、00、04、08、12年）征戰奧運會

‧07年奪世界場地賽捕捉賽金牌

‧08及09年獲世界盃場地賽金牌

個人榮譽

‧榮譽勳章（98年）、銅紫荊星章（07年）

‧香港10大傑出青年（07年）

‧8次當選香港傑出運動員、3度榮膺「星中之星」

‧香港教院榮譽院士（10年）、香港城大榮譽院士（11年）

後記：只怕「愈想寫好愈寫不好」

認識黃金寶22年，發夢都沒想過，自己見證當年贏了亞青賽回港、在啟德機場拿着金牌眼泛淚光的黃毛小子，千錘百煉後已成為香港體壇傳奇，作為舊街坊兼小學校友，容我說聲「與有榮焉」！多年來訪問過「阿寶」無數次，今天要為他來次「總結」，百感交集，採訪那天齊齊話當年，爆笑連場，內容豐富至極，但落筆時只怕「愈想寫好愈寫不好」。