籃網悍將變寵兒 「The Thing」伊雲斯

《神奇四俠》中的石頭人（The Thing）力大無窮，綽號同為「The Thing」的籃網大前鋒伊雲斯，絕不能像石頭人那樣舉起百噸重物，但卻因為在成長路目睹至親因販毒入冊、自己於選秀會名落孫山，歷盡辛酸而練成如石頭般硬淨的性格及打法，如今臨老上位，新季誓憑「防守美學」殺出新血路！

選秀冇人吼喊到變豬頭

伊雲斯在場上的打不死精神最令球迷讚嘆，籃網陣中粒粒皆星，然而最欠星味的伊雲斯卻是Fans至愛，原因就是打得夠搏！這位32歲大前鋒今季於場均20分鐘上陣時間能搶到8.1個籃板，在場時球隊場均領先對手20分，堪稱籃網效率王。

據伊雲斯的舊隊友白蘭巴利透露，「The Thing」即使在練波期間，每次搶籃板都像打保齡一樣將隊友掃低，搏得咁盡，伊雲斯自爆這是受到成長環境影響：「我爸爸同表哥都因為販毒入獄，籃球係我童年時嘅一切，2002年雄心壯志參加NBA選秀會，但竟然冇人吼，當眾喊到豬頭咁，我諗就係因為呢啲經歷令我咁堅強，並且要把握每一個機會去搏命。」

專心防守贏得尊重

伊雲斯決心成為「籃板達人」全因被恩師點醒：「當年超音速執我返嚟，麥美倫（前拓荒者教練）就係我嘅恩師，佢職業生涯場均未曾攞多過7.6分，但佢件波衫已經被超音速榮休，證明畀心機防守唔止可以幫到球隊，仲可以受到球迷尊重。」伊雲斯愈老愈紅，昨日主場對騎士後備上陣21分鐘又摘下10個籃板，助籃網以103:100贏波取得兩連勝，明早造訪馬刺有佢守住內線預計有得鍊，受讓3.5分要下盤。

The Thing小檔案

姓名：Reggie Evans

出生日期：1980年5月18日

身高：6尺8吋

効力球隊：籃網

位置：大前鋒

今季場均得分：3.0

今季場均籃板：8.1

曾効力球隊：超音速、金塊、76人、速龍、快艇