「車神」眼中4大難忘戰役

過去22年「踩」遍世界，參賽場數上千，留下幕幕經典畫面，叫「阿寶」挑選「最難忘一役」，他即面有難色：「一場？好難揀喎！」，最終「車神」講出4場別具意義的歷史戰役，亦代表着黃金寶4個階段的里程碑。

91年亞青賽‧17歲

「剛開始踩車，喺香港亂打亂撞，直至贏完亞青金牌，我搵到目標，畀自己一個承諾：要成為亞洲冠軍！細個傻傻哋，諗法好低能，覺得『老嘅淘汰晒，咁咪輪到我囉』，當然，慢慢長大後知道唔係呢回事，但呢個承諾一直放喺心底。」

97年全運會‧24歲

「香港回歸成為中國一部分，第一次用特區名義參加全運，感覺好似同失散咗好耐嘅親兄弟重聚，民族感好強，好親切，心情特別激動，嗰種愛國Feel出晒嚟，仲要畀我贏埋塊金牌，無論對自己或香港體壇，都有雙重意義。」

98年亞運會‧25歲

「由之前一屆（94年）第4、亞洲賽攞前3，跳到呢屆亞運終於贏到第1，兌現自己承諾，真係好開心！仲記得返港後同沈教練講『我要搵嘢做，唔踩喇！』因為當時我認為單車只屬興趣，點都要搵份工，後來畀教練勸服，亦開始視單車為自己工作。」

07年世界賽‧34歲

「着起Rainbow Jersey（彩虹戰衣）係每個車仔嘅夢想！其實喺香港從事任何項目，要贏世界冠軍都好艱難，作為單車界第一個做到嘅人，創造歷史，亦為港隊衝擊世界舞台取得好開始。你睇，時至今日，我哋已經有3個車手攞到彩虹戰衣！」